بعد أيام هاحتفل بمرور سنة على انشاء المدونة.ماحسيتش خالص انها سنة وعدت بس فعلا انا في حاجات فيا اتغيرت عشان بدأت اكتب. فكرة ان الواحد يكتب حاجة حاسسها أوي ويشارك الناس معاه في ذكرياته واحداث حياته و تقراها وتلمسها بيكون فيها نوع من الفخر وساعات كده لما الواحد بيأ فوور بيكون فيها سنة عنطزه,بس حتى لو محدش قرا اي حاجة برده فكرة الكتابة في مساحة ممكن ان اي حد يتكعبل فيها على النت والمساحة ديه تكون شبكة كبيرة من المعلومات مريحة ان الواحد بيقول حاجات جواه وبيعبر عن افكاره جايز حد يقراها وتفرق معاه الكام كلمة اللي قالهم أو انه بيطلع حاجة جواه كانت حارقاه و السلام

باكون مبسوط اوي لما اكتب حاجة تعجبني واتكيف منها (عادة كل البوستات اللي كتبتهم مبعرفش اذا كانت عاجباني فعلا ولا لأ الا بعد ما اقراها بعدها بفترة وساعتها بشوف اذا كانت عاجباني أوي ولا لأ لأن اكيد كل الحاجات بكون معجب بيها ساعة ما بكتبها واجي في الاخر الاقيه كلام هلاوس وتخاريف بس مايمنعش ان حتى ال أي كلام اللي بكتبه بيبقى طعمه حلو لأني باكون الوحيد اللي فاهمه وباسترجع موودي لما كتيته والأهم في الموضوع اني كتبت عن حالة عشتها وطلعتها بكام حاجة جوايا)

التدوين اتاح لي الفرصة اني اقرا كلام ناس تانية واكون فكرة واخمرها واستناها ياتتطلع في الوقت بتاعها أو لأ

التدوين اتاح لي الفرصة اني اكون اكثر انفتاحا على الناس وكون اكثر جرأة واقتناعا برأيي.ولعل أكبر دليل اني بعبر عن حاجاتي ان ساعات بكتب كلام قبيح ومش بقول يانهار اسود لو حد اعرفه قراه الكلام ده لأن الصفحة ديه عالمي الخاص اللي بكتب فيه اللي انا عايزه وبدوره باستقبل أي كلام حضراتكم عايزين تكتبوه في التعليقات انشا الله حتى تشخرولي أو تسبولي الدين. تذكروا : انتم في صرح الديقراطية,واذا فتحتم قلبي فستجدون بطين ايمن وبطين ايسر وفي النوص هتلاقوا حب الجماهير الوفية المخلصة للسيد المدون. هتلاقوا سلخة من الحرية وشلخة من الديقراطية وبردخ من الليبرالية وسنتح من السنكفلية ال أي ... ها....ردوا عليا, ايوووون : البليبليية

في بوستات بتلمس اتنين (يمكن هما الاتنين الوحيدين اللي بيقروا البلوج بس هما من اهم اتنين باكتبلهم. فاكرين : سيجا ,متزعلش ياعلي,قصر البارون والادمان,فراغ
مش مهم اني الاقي عدد الزوار يتكون من 3 ارقام المهم ان الاتنين دول يتأثروا بالكلام اكتر من اني اقولهم في وشهم

يارب السنة اللي جايه تعدي بطريقة احسن واحسن ومتكونش طيزي تقيلة واقدر اكتب علطول. يارب عديها على خير عشان زي الوقت ده من السنة اللى جايه هيكون في حاجات كتير اوي اتغيرت وربنا يستر.

سؤال

هل تؤيد منع الرقابة للأعمال الفنية (الروايات,الافلام,...) التي يتم اتهامها بازدراء الاديان (الاسلام أو المسيحية) وذلك للمحافظة على افكار وعقول المشاهدين كما تدعي واحترام الرموز الدينية ولا انتوا شايفين ام المفروض الجمهور يكون الرقيب وهوا اللي يقرر ويقول كلمته؟

مستني ارائكم وياريت لو بأمثلة على اعمال تم منعها ورأيك فيها بالمواقفة أو الرفض على المنع

شكرا