والله العضظيييم مبضوووووون نييييييييييييك ومش طااايق نفسي

قغدت اكتب في بوست بتاع نص ساعة وبعدين بعد ماخلصت نسيت تماما اني مش موصل النت ودوست على اللينك راح اداني "باييج كانووت بيي ديسبلاايد" جييت اعمل بااك كانت كل حاجة راحت باي باي وقعدت ادور ولا لقيت اي حاجة

احححححه بجد

من أشعار علي سلامة... 4

أنا المواطن نقط نقط نقط

ولا بتهان وأسكت زى زمان

أنا بصرخ وأكتب وأبعت وأتكلم ...

وأسمع بقى يا معلم ...

أنا المواطن نقط نقط نقط....
رقم قومى نقط نقط نقط...
محل الأقامة نقط نقط نقط بجوار البنزينة

بصراحة حرام تعملوا فينا نقط نقط نقط...
وتطلعوا نقط ونقط أهالينا ...
عملتوا انتخابات وكلها نقط نقط نقط ...
وشيلتوا وحطيتوا حاجات نقط نقط نقط ...
بصراحة ...
أنا بقيت قدام مراتى حاسس انى مش نقط خالص ...
وأقولها نفسى أبقلى نقط بجد ..
تقولى يا اخويا ماتحرقش دمك
محدش بينفع حد...
حسك ف الدنيا ..
بكرة تبقى نقط نقط نقط ....!!!

من أشعار علي سلامة... 3

لب وسوداني



بقول لها ..
ما تيجي نهزر ..
نجري ونلعب ..
ونكسر كل الحاجات ..
ونجيب م اللي فات ..
يومين حلوين ....
قالتلي والنبي إنت فايق ورايق ..
قولتلها ...
طب وليه نتضايق ..
إحنا لسه صغيرين ..
وأكبر عيالنا ..
يا دوب تسع سنين ..
يعني لو بنحكم مصر ..
تبقي يا دوب لفة ونص ..
مش عشرين ..
- وطي صوتك البت بتذاكر ..
والواد مصدقت إنه نام ...
إنما إيه اللي صحي ف قلبك ..
من تاني الغرام ..
قولتلها جوايا كلمتين غزل ..
قالتلي والنبي إنت عسل ..
بس الظروف ..
- مالها الظروف ..
فاكرة لما كنتي ..
بتحوشي م المصروف ..
جبتيلي ورد ف عيد ميلادي ..
- وجبتلك بلوفر صوف ..
- وجبتيلي بلوفر صوف ..
- فاكر لما بوستني ..
وإحنا لسه مخطوبين وأبويا لاحظ ..
يالهوي كنت هموت م الكسوف
- فاكرةأول مرة قلت لك بحبك ..
وشك إحمر ..
- إنت اللي وشك كان مخطوف ..
- مش إنتي كنتي بترسمي زمان ..
- وإنت كمان كنت بتكتب شعر ..
- هو احنا بطلنا نحس ..
- إحنا بطلنا نشوف ...
وطلعنا اللب والسوداني ..
وفتحنا التليفزيون ..
وسكتنا تاني ..
ولا زال السبب ..
غير معروف ..
غير معروف

من أشعار علي سلامة... 2

وإحنا لسه في إبتدائي
وسط أوراقى القديمة
اللى لسه منها باقى
شوفت صورتى بين زميلى
و أحنا لسه فى إبتدائي
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقي
هو صاحبى
لما كان فى الدنيا صاحب
أما دول كانو من جيرانى
كل واحد فينا حقق
جزء من بعض الأمانى
أما دى الشاطرة البليدة
العنيدة أم الضفاير
تبقى حبى الأولانى
أد إيه حزنت عليها
لما راحت فصل تانى
ما أحنا كنا تخته واحده
فى تانيه تالت
مره قلت
و هى قالت
لما مدت أيدها شالت
دمعة وقعت غصب عنى
جوه كراسة الحساب
كنا لسه صفحه بيضه فى الكتاب
الوشوش كانت بسيطه
طاهرة لكن مش عبيطه
نرسم الأحلام خريطة
فى قلبها نقطة تلاقى
وأحنا لسه فى أبتدائي

من أشعار علي سلامة... 1

كتاب القراءة

بمنتهي البراءة ...
سأليتني …
بنتي نور ....
ف أربع خمس ..
أمور …
مش ف كتاب القراءة ....
قالتلي .. بابا بابا ..
مش إنت .. يا بابا ..
بتكتب أغاني ..
وتقول أشعار ..
أنا سمعت ..
الشيخ يا بابا ...
بيقول إنك يا بابا …
ها تروح النار ...
زي الوحشين يا بابا ...
الحراميين الكفار ....
قوللي يا بابا ....
يعني إيه إستعمار ....
يعني إيه نيل ...
يعني إيه هرم ..
ومين اللي حط ...
النسر فوق العلم ...
يعني إيه يا بابا ...
إستفتاء ….
و يعني إيه إنتخاب ...
ويعني إيه حر ...
ويعني إيه نصاب….
يعني إيه إختلاس ..
ويعني إيه هجاص ..
ويعني إيه خصخصة ..
يعني إيه يا بابا ....
دستور ….
يعني إيه معارضة ..
ويعني إيه مظاهرة ..
وليه النهاردة ...
خدنا أجازة ...
م المدرسة .....
قوللي يا بابا ....
يعني إيه قهر ..
وفين …
خط الفقر ...
ويعني إيه حظ ..
ويعني إيه زهر ...
يعني إيه يا بابا ...
حريه …..
يعني إيه إنسان ..
ويعني إيه سرطان ...
يعني إيه يا بابا ...
خربوها ….
ومين دول يا بابا ..
ولاد القطقوطة ...
ومين دي ...
سمارة يا بابا ....
وإزاي يا بابا ...
ضاعت من قلبك ...
يا بابا .....
إنت معايا ....
فيه يا بابا ناس ...
بتقول كفايه ...
وفيه كمان عساكر ...
مسكين عصايا ...
وبنات متعورين ...
وتانين …
ماشين بيضحكوا ...
هما دول إسرائلين ..
يا بابا .....
ويعني إيه ...
ويعني إيه ...
قولتلها ….
نور …..
ممكن أسألك سؤال
قالتلي ….
إتفضل يا بابا ...
قلتلها ….
هيه قناة Space toon ...
رقم كام …..
وخدتها .....
عشان تنام

الوطن يباع والوطني هو المستفيد

فى يوم ‏2007‏-12‏-26 كنت موجود امام احد اللجان (مدرسة احمد لطفى السيد) و ذللك اثناء اجراء انتخابات مجلس لشعب بدائرة المنيل علي المقعد الذي خلا باستقالة النائبه شاهيناز النجار وكان حزب الجبهه قد قدم مرشحه د:اشرف بلبع مرشحا عن الحزب لهذه الدائره

بمجرد وصولي الي اللجنه انا وفريق معي وجدنا عدد كبير من البلطجيه امام اللجنه حاولنا الانظهر اهتمامنا وبدأنا في المهمه التي جئنا من اجلها وهي تعريف الناخبين بحزب الجبهه ومرشحه

كان الاقبال ضعيف في السااعات الاولي من الانتخاباتولكن علي الرغم من ذلك كنت اشعر باستجابه طيبه ممن قدموا للادلاء باصواتهم وخصوصا ان عدد كبير منهم يعرف حزب الجبهه ورموزه مما جعلني اشعر بان المجهود الذي بذله الحزب سوف تكون نتائجه جيده.

ولكن كان واضح من اللحظه الاولي ان الحزب الوطني كان قد اعد خطه محكمه لتشويه صورة حزب الجبهه امام الناس الذين تعاطفوا معه وشعروا انه قد يفعل شيئا من اجل اصلاح مصر

بعد حوالي ساعتين ونصف من وصولنا امام اللجنه قام احد مندوبي الوطني او بلطجيته باجراء مكالمه هاتفيه بجانبي وقد استمعت اليه يقول(بتوع الجبهه عمليين شغل جامد مش هينفع كده يا باشا) ولم تمر نصف ساعه حتي بدأت الاتوبيسات تتوافد امام اللجنه كانت تلك الاتوبيسات محمله باعداد كبيره من البلطجيه و من فئات شديدة الفقر قام الركاب بالنزول لتبداء عملية توزببع البطاقات الانتخابيه المزوره (كان احد البلطجيه يحمل كيسا كبيرا يقوم يتوزيع البطاقات الانتخابه علي الوافدين) وبداء المزاد وقد كان المزاد علي اشده بين مندوبيمرشح الوطني اشرف علام ومندوبي المرشحه ايمان بيبرس وكانت هناك سيده تختفي كل عشر دقائق وتعود لتجر خلفها عدد كبير ممن جاوا لبيع اصواتهم.

سألت احد السيدات (انتي اخذتي فلوس يا حاجه؟؟؟؟؟ اجابتني بدون مراوغه نعم فسألتها هتنتخبي مين يا حاجه ؟؟؟

فأشارت الي صورة مجدي علام في ورقه تقبض عليها بيديها فسألتني هي بدورها؟؟ انتوا بتدفعوا كام ؟؟؟؟

فأجبت : احنا مبندفعش فلوس يا حاجه فتركتني وغادرت

بداء المزاد يزداد اشتعالا بين ايمان بيبرس ومجدي علام وانا اشعر بعجز شديد حاولت انا والفريق الذي كان معي ان نقوم بالتصوير ولكننا وجدنا حشودا من البلطجيه متربصه بنا تقوم بأفتعال المشاكل معنا كل لحظه فأدركنا ان ما نريده هو مستحيل

كاد ان يجن جنوني وكان الشعور بالعجز يتعاظم بداخلي وجدت احد ضباط الشرطه اسرعت اليه اخبرته بما يحدث فنظر الي نظرة سخريه وتركني ومضي في طريقه

بدأت الحشود تتوافد اكثر والاسعار ترتفع اكثر فاكثر مازلت اذكر صوت احدي السيدات التي جأئت وسألتني (هي الفلوس نأخذها منين؟؟) مازلت اتذكر سيده لم اقابلها مره في حياتي جائت تناديني بأسمي وتطلب مني ان اعطيها خمسة جنيهات مقابل عشرة اصوات تأتيني بهم

لقد وقفنا امام اللجنه انا ومن معي ساعات تعرضنا فيها لابشع انواع المضايقات من بلطجية الوطني وجدنا العقبات توضع امام كل من جاء لانتخاب مرشح الجبهه اتصل بنا زملانا من امام اللجان الاخري يخبروننا بان الامن المركزي يمنع وصول مؤيدي الجبهه الي الصناديق رأينا البطاقات الانتخابيه المزوره توزع علي الناس ولم اتأثر ولكن ما جعل فيضان من الحزن يندفه بداخلي هو الحشود الفقيره التي نجح الحزب الوطني في تحويلها الي متسوليين الشعور بالعجز وانا اري بلدي تباع امام عيني وانا عاجز لا استطيع فعل شيء سوي ان امنع دموعي من ان تسيل امام الناس

نعم كنتع عاجزا ولم استطع ان اخرج ما بداخلي الا في مظاهره خرج فيها اعضاء الحزب بعد قرار انسحابنا من المهزله الانتخابيه لنصرخ كلنا باطل باطل

ولكن حتي التعبير عما بداخل الانسان اصبح ممنوعا في مصر فلقد حوصرنا من قبل الامن المركزي وهددنا باستدعاء قوات الطواريء وحوصر المقر الانتخابي للحزب لتظل عملية بيع مصر مستمره والمستفيد هو الحزب الوطني بمباركة الاجهزه الامنيه.

عمرو صلاح عضو بحزب الجبهة الديمقراطية