اخرجوا لوحدكم, مش لازم تعرفوا انتوا رايحين فين
اتمشوا في الشوارع,بصوا في وشوش الناس وانتوا مدينهم ابتسامة خفيفة تنم عن الرضا وتدخل القلب على طول
لو ولاد اقعدوا على أي قهوة واسمع الناس وهي بتتكلم مع بعض وأي راجل بيبيع أي حاجة بيعدي عليك في القهوة اشتريها حتى لو انت مش محتاجها وحسسه انك محتاجها عشان ميحسش انك بتديله حسنة
لو بنات اتفرجى على المحلات والهدوم وخشى قيسي كأن الفلوس كلها في جيبك ولا يهمك أي حد,اصل ايه اكتر حاجة وحش ممكن تحصل, ولا حاجة, مافيش حد ليه عندك حاجة.انبسط وابتسم للناس
اقعدوا على الرصيف,اضربوا كبدة وسجق
جيبوا جرايد بنت وسخة ملهاش لازمة واقروها على القهاوي وشوف الناس بتتكلم في ايه
اضحك لبنت جميلة وبصلها لما تعدي وراك
قول هاللو لأجانب في وسط البلد وانت معدي قدامهم
اركبوا اي مواصلات فاضية ومتبصوش هيا رايحة فين ومتسألش
استحموا في ساعة عصاري وشيلوا شعر جسمكموشم ريحة جسمك النضيفة واشربوا كوباية شاي بعدها وانزلوا الشوارع
لو حاجة معجبتكمش قولوا بس بأدب واقتناع اني مش لازم اضرب اللي قدامي عشان يقتنع باللي عايز اقوله
اقفوا دقيقة واسمعوا صوت مؤذن عذب يخلى جسمك يقشعر وهوابياذان المغرب
متمسكش نفسك من العياط وانت متأثر بفيلم في السينما
اشتروا قزازة ميه وخلوها معاكم وانتم بتتمشوا
البسوا سبحة في ايديكم عشان لو لقيت نفسك فاضي تقعد تسبح أو تستغفر وكمان شكلها بيكون حلو واهى حاجة بتلعب بيها في ايدك
حبوا الناس بس قبل ماتحبوهم حبوا نفسكم
