سيجا

الأنسان بطبعه بينسى وعشا ن كده يمكن منفتكرش تفاصيل كتير أوي كانت في حياتنا بس لما بنفتكرها بننبسط أوي. يعني انا متأكد ان لما يكون عندي 30 سنة مش هفتكر حاجات كتير من اللي بتحصللي دلوقتي. وده يودينا لسؤال تاني وهوا انا فاكر ايه من 10 سنين فاتواز سنة 97؟
يمكن انا قاعد دلوقتي بفكر ومش لاقي حاجة اكتبها عن السنة ده. تقريبا كان فرح أخويا الكبير فيها. ايوه صح, انا حسبتها وطلع فعلا 24 7 97 كان في سوفتيل المعادي وفاكر بعديها اصحاب اخويا اخدوني وقعدوا بيا في قهوة في المعادي طبها انا مش فاكر هيا فين.يمكن ديه الحاجة الوحيدة اللي تيجي في دماغي عن 97. ممكن عشان بنكون صغيرين ومكنش في احداث كتير في حياتنا.طب اشمعنا انا فاكر كويس حاجات من 94.السنة اللي بحبها أوي. المونديال والماتشات اللي بتيجي الساعة 3 الصبح. ماتش كولومبيا وأمريكا والواد اللي اتقتل عشان جاب جون في نفسه.كنت لسه واخد الاجازة والدنيا حر في السعودية ومقديها تليفزيون واتاري.ماتشات الدوري السعودي اللي كنت باتبعها اححححه.واللي يضحك اكتر ان لما بيلعبوا ضربات جزاء كنت بجيب ورقة وقلم واحسب مين ضيع الكورة ومين جابها قال يعني مش مكتوبة على التليفزيون. ربنا يخليلنا الدش اللي رحمنا من القناتين السعودية الارضية اللي الناس كانت بتسميهم "غصب 1 وغصب 2"
فاكر أوي كل يوم لما كنت بصحا الصبح لروح المدرسة(كنت بروح بدري أوي. اول واحد في المدرسة .منك لله ياعمو نبيل اللي كان بيوصلني في طريقه) كان ابويا بيقعد على سجادة صلاة وهو بيفطر واضرب الشاي والبقسماط بتاعي. وابويا يحطلي العصير في الشنطة بتاعتي.
-يوم ماشتريت جهاز السيجا.كنت هاشخ واجيبه وابويا جابهولي لما نجحت.كنت كل مرة بكبسه لما كنت بنجح واطلع الاول-اه والله الاول- ملاحظة : الكلام ده انا كنت في ابتدائي وكنت في السعودية يعني بتعلم مع بقر فابنسبالهم انا عبقري لذا لزم التنويه.
المهم لسه فاكر المحل اللي استريت منه السيجا وأول شريط حبته مع الجهاز كان فيفا 94 وفضلت العب على الجهاز ايام وليالي.كل شهر بعد التقرير بتاع الشهر (وبرده كنت بطلع الاول في الامتحانات الشهرية مش قلتلكم بقر كنت بنزل انا وابويا واجيب شريط للسيجا مصارعة-سونيك كانت في لعبة بنت وسخة كده لمايكل جاكسون احه ايه اللي انا كنت بعمله وانا منت صغير ده غير شرايط كتير انا مش فاكرها زي مافي حاجات كتير بننساها وانا بفتكر الحاجات ديه مرسومة على وشي ابتسامة جميلة يمكن بقول لنفسي يااه فين الايام ديه لما كان الواحد لسه نضيف ومتوسخش الواحد كان بياكل ويلعب وينام ومش شايل هم حاجة. اللي يسمع كده يقول انا بجري على كوم لحم ويقول جدو يتحدث عن نفسه انا متاكد لما يكون عندي 30 سنة هقول فين يوم من ايام 2007 طبعا هكون لسه مشوفتش جيش وحبس ومعتقل ومظاهرات وتهمة اهانة رئيس اعزبة عفوا الجمهورية وضابط احتياط وشغل واكون نفسي والمزيد من وساخة الايام وزود عندك قحبنة الزمن وعجبي

شكرا ياباب على كل اللي عملتهولي انا عارف اني هندم اوي اني مقربتش منك وعرفتك اكتر احتجتني واحتجتلك لما متكونش موجود